Sabhya Samaj(Civilised Society) – A hindi Poem by Prakhar Shukla

Pair zameen par rakhte hi

Pairon mein chhale pad jaate hain.

Uss masoom ki dekh haalat

Mere nain wahi gadh jaate hain.

Zakhm ke kaaran bacha

Pair rakhne se katra raha.

Usne dekha ek bacha

Jo kapde pahen itra raha.

Mera ye kaisa jeevan

Jo inn zakhmo par chal raha.

Unka surya mare dhalne par

Mera paida hote dhal raha.

Dekho aaye bade neta

Seva me koi kami nahi.

Hum jaise jeevit murde ki

Yaha par koi kami nahi.

Saamne jo pad jaaye to

Gaali de nikale jaate hai.

Asabhya phir hame hi keh le

Agar ye sabhya kehlaate hai.

     – By Prakhar Shukla